Perezida Kagame na Madamu Jeannette Kagame bitabiriye ‘Grandaparents Day’ muri Green Hills Academy

 

 

Perezida Kagame na Madamu Jeannette Kagame bitabiriye umunsi wahariwe ba ‘Nyogokuru na ba Sogokuru’ [Grandaparents Day] muri Green Hills Academy, aho bishimiye igitaramo mu mbyino gakondo z’umuco nyarwanda zabyinwe n’abanyeshuri biga mu mwaka wa gatatu w’amashuri y’inshuke.

Ibi birori byabaye ku wa 20 Gicurasi 2026, muri Green Hills Academy. Byitabiriwe n’abanyeshuri na ba Nyirakuru na ba Sekuru b’abana biga muri iri shuri.

Ubutumwa bwashyizwe kuri konti ya X y’Ibiro by’Umukuru w’Igihugu, Village Urugwiro bugira buti “Perezida Kagame na Madamu Jeannette Kagame bitabiriye umunsi wahariwe ba ‘Nyogokuru na ba Sogokuru’ [Grandaparents Day] muri Green Hills Academy, aho bishimiye igitaramo mu mbyino gakondo z’umuco nyarwanda zabyinwe n’abanyeshuri biga mu mwaka wa gatatu w’amashuri y’inshuke. Uyu munsi wabaye amahirwe kuri ‘Sogokuru na ba Nyogokuru’ yo kwizihiza umuco nyarwanda hamwe n’abuzukuru babo.”

Umunsi wahariwe ba Sogokuru na ba Nyogokuru wizihizwa hagamijwe kubaha icyubahiro no kubashimira umusanzu batanga mu kubaka umuryango wabo na sosiyete muri rusange.

Muri Amerika wizihizwa muri Nzeri buri mwaka ariko mu bindi bihugu bahitamo itariki ibanogeye, igice kinini bakishimira urukundo, ubumenyi n’inama bahabwa na ba Nyirakuru na ba Sekuru.

Uyu munsi wizihizwa abafite ba Sekuru cyangwa ba Nyirakuru bajya kubasura, baboherereza impano, gutegura umusangiro n’umuryango wose na ho ku mashuri bagategura ibirori aho abana bashimisha ba Sekuru na ba Nyirakuru.

Perezida Kagame na Madamu Jeannette Kagame bitabiriye Grandparents Day muri Green Hills Academy

Bishimye mu myino gakondo zabyinwe n'abana bo mu wa gatatu w'inshuke

Perezida Kagame na Madamu Jeannette Kagame bizihije uyu munsi hamwe n'abana biga mu wa gatatu w'amashuri y'inshuke